सन् २०२२ मा कतारमा आयोजना हुने विश्वकपको दोस्रो चरणको छनोटमा नेपालले आज ‘बिहिबार’ पहिलो लेगमा घरेलु टोली कुवेतविरुद्व खेल्दै सुरुवात गर्दैछ । कुवेतको जविर अल अहमेद ईन्टरनेश्नल मैदानमा हुने खेल नेपाली समय अनुसार रातिको १०:४५ मा सुरु हुनेछ ।

नेपालले पहिलो पटक सिधै दोस्रो चरण खेल्न लागेको हो । नेपालको समुहमा अष्ट्रेलिया, कुवेत, जोर्डन र चाईनिज ताईपे छन् । नेपालले होम एण्ड अवेका आधारमा समुहका चार टिमसंग प्रतिस्पर्धा गर्नेछ ।

फिफा वरियतामा नेपाल १ सय ६६ र कुवेत १ सय ५६ औ स्थानमा छ । त्यसैले नेपाललाई आजको खेलमा जित निकाल्न तेति सजिलो भने हुनेछैन । नेपालले अहिलेसम्म कुवेतलाई हराउन पनि सकेको छैन।

कुवेतसँग प्रतिस्पर्धा गर्न टिम तयार: कप्तान चेम्जोङ

नेपाली राष्ट्रिय फुटबल टिमका कप्तान तथा गोलरक्षक किरण चेम्जोङले विश्वकप छनोट अन्तर्गत घरेलु टिम कुवेतसँग प्रतिस्पर्धा गर्न टिम तयार रहेको बताएका छन् । कतारमा सन् २०२२ मा आयोजना हुने विश्वकपका लागि दोस्रो चरणको छनोट अन्तर्गत कुवेतसँगको खेलअघि प्रि म्याच कन्फरेन्समा बोल्दै कप्तान किरणले बलियो टिमविरुद्ध मैदान उत्रन टिम तयार रहेको बताए ।