नेपाल कम्युनिस्ट पार्टी (नेकपा) केन्द्रीय कमिटी बैठकमा समूह नेता राजेन्द्र राईले पार्टीभित्रको बेथिति देख्दा कमण्डलु बोकेर जोगी बन्न मन लागेको बताएका छन् ।

बैठकमा समूह छलफलको रिपोर्टिङ गर्दै ११ नम्बर समूह नेता राईले पार्टी संगठन चौपट भएको गुनासो गरे ।

‘संगठन चौपट भयो, नेताहरूका आचार व्यवहार बिग्रिए । मलाई वैराग लागेर आउँछ, कमण्डलु बोकेर जोगी बन्न मन छ,’ राईले बैठकमा व्यक्त गरेको निराशा उदृत गर्दै एक केन्द्रीय सदस्यले भने ।

पार्टी बिग्रिएर कार्यकर्ता चिन्तित हुँदा समेत शीर्ष नेताहरू आनन्द मानेर रमाइरहेकोप्रति राईले झन् चिन्ता व्यक्त गरे । ‘सरकार पार्टीको निर्देशन अनुसार चल्नुपर्ने हो तर पार्टीको निर्णय सरकारले अवज्ञा गरिरहेको छ,’ राईले बैठकमा भने ।