पार्टीभित्र चौतर्फी घेराबन्दीमा परेपछि प्रधानमन्त्री केपी शर्मा ओलीले मन्त्रीहरुसँग राजनीतिक परामर्श गरेका छन् । त्यसका लागि प्रधानमन्त्री ओलीले मन्त्रीहरुलाई सरकारी निवास वालुवाटारमा बोलाएका हुन् ।

मंगलबारको स्थायी समिति बैठकमा प्रधानमन्त्री ओलीको राजीनामाको माग तीब्ररुपले उठेको थियो । बैठक धारणा राख्ने शीर्ष नेतासहित १७ जनाले अध्यक्ष र प्रधानमन्त्री दुवै पदबाट राजीनामा दिन माग गरेपछि बिहान प्रधानमन्त्री ओली राजनीतिक परामर्शका लागि मन्त्रीहरुलाई बोलाइएको जनाइएको छ ।
कृषि तथा पशुपन्छी विकासमन्त्री घनश्याम भुसालले प्रधानमन्त्री ओलीले आफूहरुलाई ८ बजे बालुवाटार बोलाएको जानकारी दिए ।

सरकारको नेतृत्व गरिरहेका प्रधानमन्त्री केपी शर्मा ओली स्वेच्छाचारी ढंगले अघि बढ्न खोजेपछि पार्टीको मुख्य कमान्ड मानिने सचिवालयका पाँच प्रमुख नेताहरूले स्थायी कमिटी बैठकमै उनको राजीनामा मागेका थिए ।

नौ सदस्यीय सचिवालयमा रहेका अर्का अध्यक्ष पुष्पकमल दाहाल, वरिष्ठ नेताहरू झलनाथ खनाल र माधवकुमार नेपाल, उपाध्यक्ष वामदेव गौतम, प्रवक्ता नारायणकाजी श्रेष्ठसहित मंगलबार बोल्ने अन्य १२ स्थायी कमिटी सदस्यले पार्टी र सरकार दुवैबाट ओलीको राजीनामा मागेका थिए ।