काठमाडाैँ – योवर्ष भाइटीकाको उत्तम साइत मंसिर १ गते सोमबार बिहान ११ बजेर ३७ मिनेटमा रहेको नेपाल पञ्चाङ्ग निर्णायक समितिले जनाएको छ । समितिका अनुसार कात्तिक शुक्लपक्ष द्वितीया सोमबार बिहान ९ बजेर १२ मिनेटबाट सुरू भई २ गते मंगलबार बिहान ७ बजेर ८ मिनेटसम्म रहेको छ तर मध्याह्नकालमा भाइटीका लगाउनुपर्ने धर्मशास्त्रको नियम भएकाले १ गते नै साइत राखिएको समितिका सदस्यसचिव सूर्यप्रसाद ढुंगेलले बताए ।

उनका अनुसार आइतबार गोवर्द्धन पूजा १२ बजेभित्र सम्पन्न गर्नसके उचित हुनेछ । नेवार समुदायको ‘म्हः पूजा’ को साइत आइतबार बेलुका ७ बजेर ८ मिनेटदेखि ९ बजेर २२ मिनेटसम्म रहेको पाटनका विभिन्न जातीय समाज र गोल्डेन टेम्पलका पुरोहितले जनाएका छन् ।

प्रायः नेवार समुदायले भाइटीका साँझ गर्ने भएकाले बेलुका ७ बजेर ५ मिनेटदेखि ९ बजेर १८ मिनेटसम्म साइत परेको पाटनका ताम्राकार समाजका अध्यक्ष रवीन्द्रराज ताम्राकारले बताए । कान्तिपुर दैनिकमा खबर छ ।