काठमाडौं । वर्तमान केपी ओलीको सरकारमा तीन जना उपप्रधानमन्त्री हुने भएका छन् । प्राप्त समाचारअनुसार विष्णु पौडेल उपप्रधानमन्त्री र अर्थमन्त्री, रघुवीर महासेठ परराष्ट्रसहित उपप्रधानमन्त्री र राजेन्द्र महतो शहरी विकाससहित उपप्रधानमन्त्री हुने भएका हुन् ।

यसअघि भने इश्वर पोखरेल एकजना मात्र उपप्रधानमन्त्री थिए । तर उनी पनि प्रधानमन्त्री कार्यालयमा रहनेगरी भनी विनाविभागीय जस्तो थिए । यस पटकको मन्त्रिमण्डल पुनर्गठनमा उनी बाहिरिएका छन् ।

वर्तमान ओली सरकारमा यसअघि माओवादी केन्द्र सरकारमा सहभागी थियो भने उ निस्किएपछि एमालेकै अल्पमतको सरकार थियो । सरकारमा आजदेखि जसपा प्रवेश गरेको छ । सरकारमा जसपाको नेतृत्व गर्ने राजेन्द्र महतोले उपप्रधानमन्त्री पदको दाबी गरेपछि प्रधानमन्त्रीले पनि आफ्नो दलबाट दुई जना थपेका हुन् ।

पोखरेल सरकारमा नरहने भएपछि एमालेबाट विष्णु पौडेल र रघुवीर महासेठ उपप्रधानमन्त्री बनेका हुन् । त्यस्तै शेरबहादुर तामाङले भने राम्रो मानिएको स्वास्थ्यमन्त्री पाउने भएका छन् ।