काठमाडौं । नेपाली कांग्रेसका सभापति शेरबहादुर देउवाले पार्टीमा केही असहमति भए त्यसलाई छलफल गरेर समाधान गर्नुपर्ने र पार्टीलाई जीवन्त बनाइराख्नुपर्ने बताएका छन् । उनले वर्तमान सरकार सफल हुने दाबी समेत गरेका छन् ।

पार्टीको केन्द्रीय नीति, अनुसन्धान तथा प्रशिक्षण प्रतिष्ठानको आयोजनामा भैरहवामा सुरु भएको दुई दिने प्रशिक्षण कार्यक्रमलाई सम्बोधन गर्दै देउवाले सत्तामा प्रमुख दल कांग्रेस–एमाले भएपनि अन्य दलको पनि सहभागी हुनु राम्रो कुरा भएको बताए । उनले नेपालको शासन प्रणाली लोकतान्त्रिक र समावेशी भएको बताए । उनले लोकतान्त्रिक व्यवस्थामा प्रतिपक्ष दल आवश्यक हुने बताए ।
उनले अघिल्लो पटकको भन्दा धेरै सिट जित्ने गरी चुनावको तयारीमा लाग्न नेता कार्यकर्तालाई निर्देशन पनि दिएका छन् । चुनावमा एउटामात्र दलले बहुमत ल्याउने परिस्थिति नभएको भन्दै उनले अघिल्लो चुनावमा भन्दा बढी सिट जित्नुपर्ने विचार राखे ।
प्रशिक्षणमा उपसभापति एवं केन्द्रीय नीति, अनुसन्धान तथा प्रशिक्षण प्रतिष्ठानका प्रमुख पूर्णबहादुर खड्का, नेता डा. शेखर कोइराला, दुई महामन्त्री, पूर्वमहामन्त्री, नेताहरू कृष्ण सिटौला, विमलेन्द्र निधि, बालकृष्ण खाँण, रमेश लेखक, आरजु देउवा लगायत नेताहरू सहभागी हुने कांग्रेसले जनाएको छ ।