काठमाडाैं – संघीय संसदको बैठक आज बस्दै छ । संसद सचिवालयका अनुसार बैठक दिउँसो १ बजे बस्ने भएको हो।

प्रतिनिधि सभाका सचिव गोपालनाथ योगीले जारी गरेको सूचनाका अनुसार आजको बैठकमा दुई विषयमा छलफल हुने छ ।

बैठकमा सञ्चार तथा सूचना प्रविधिमन्त्री ज्ञानेन्द्र बहादुर कार्कीले राष्ट्रिय सभाको सन्देश सहितको ‘नेपाल मिडिया काउन्सिल विधेयक, २०७६ माथि विचार गरियोस् भनी प्रस्ताव प्रस्तुत गर्ने सम्भावित कार्यसूची रहेको छ।

सचिवालयका अनुसार कानून, न्याय तथा संसदीय मामिला मन्त्री गोविन्द प्रसाद शर्माले ‘वेपत्ता पारिएका व्यक्तिको छानबिन, सत्य निरुपण तथा मेलमिलाप आयोग (तेस्रो संशोधन) विधेयक, २०७९ लाई दफावार छलफलका लागि समितिमा पठाउन प्रस्ताव प्रस्तुत गर्ने कार्यसूची रहेको छ ।