काठमाडौं। एमालेले आफूलाई शून्य नपार्न गरेको आग्रहले सत्ता गठबन्धन दलका दलहरूबिच राष्ट्रिय सभा सदस्यको सिट बाँडफाँटका लागि भएको छलफल निष्कर्षविहीन भएको छ । बालुवाटारमा बुधवार साँझ बसेका शीर्ष नेताहरूले सत्ता गठबन्धनका दलहरूले कति कति सिटमा आफ्ना उम्मेदवार उठाउने भन्ने टुङ्गो गर्न सकेनन् । 

बैठकपछि एकीकृत समाजवादीका उपाध्यक्ष राजेन्द्र पाण्डेले भागबन्डाबारे छलफल नटुङ्गिएको बताएका छन् । उनले प्रधानमन्त्री पुष्पकमल दाहाललाई एमाले अध्यक्ष केपी शर्मा ओलीले ‘हामीलाई जिरो नगर्नु’ भन्ने खालको प्रस्ताव आएको भन्दै छलफल पूर्ण रूपमा टुङ्गो नलागेको बताए । 

नेता पाण्डेले भने, ‘२० सिट खाली छ, त्यसमा एमाले पार्टीकै प्रतिनिधिहरू रहेको ९ सिट खाली छ । यसमा हामी कसरी जान्छौँ भन्ने खालको सल्लाह भयो । सल्लाह टुङ्गिएको छैन । प्रधानमन्त्रीलाई एमाले अध्यक्षले हामीले जिरो नगर्नु भन्ने खालको प्रस्ताव आयो भनेर बुझौँ, त्यसपछि हामीले यस बारेमा बुझेर मात्रै टुङ्गो गरौँ भन्ने छ । एमालेको प्रस्ताव के हो हामीलाई जिरो नगर्नु भनेपछि के हो माग, त्यो स्पष्ट भएको छैन । उताबाट त्यो स्पष्ट रूपमा आएपछि कुराकानी गर्न सजिलो हुन्छ ।’ 

यस्तै एमाले र कांग्रेसको आपसी सहमति भएको हो ? भन्ने सञ्चारकर्मीको प्रश्नमा उनले त्यो सहमति ‘कन्डिस्नल’ रहेको बुझ्नुपर्ने बताए । 

बैठकमा भारतका विदेश मन्त्री आउने, भारतसँग भएका कतिपय सन्धिहरू छन् मध्य पञ्चेश्वर र महाकाली सन्धिका उल्लेख भएका कुरामा कसरी जाने त्यसको तयारी बारे प्रधानमन्त्रीले ब्रिफिङ गरेको पनि पाण्डेले जानकारी दिए ।