काठमाण्डौ

हिन्दू राष्ट्र कायम गर्न सरकारलाई दबाब दिने उद्देश्यसहित एकीकृत राष्ट्रिय प्रजातन्त्र पार्टी राष्ट्रवादीले काठमाडौंमा तीन दिने सडक संघर्षको कार्यक्रम घोषणा गरेको छ ।
पार्टीका अध्यक्ष डा. प्रकाशचन्द्र लोहनीले सबै धर्मको सम्मान गर्दै मुलुकमा हिन्दू राष्ट्र कायम गरिछाड्ने पार्टीको मूल एजेन्डा स्थापित गराउनेगरी सरकारलाई दबाब दिन बुधबार, विहिबार र शुक्रबार काठमाडौंमा सडक संघर्ष गर्ने निर्णय गरिएको जानकारी दिए । आज राजधानिमा पत्रकार सम्मेलन गरी लोहनिले सडक संघर्षको क्रममा राष्ट्रिय एकताको प्रतिकको रुपमा राजसंस्थाको पुनस्र्थापना, भ्रष्टाचारको अन्त्य, युवा रोजगारीको अवसर सृजना गर्ने बाटोको खोजी गर्न पनि सरकारलाई सडकबाटै दबाब दिने बताए ।

एकीकृत राष्ट्रिय प्रजातन्त्र पार्टी राष्ट्रवादीले मुलुकलाई राजनीतिक स्थायित्व दिन समानुपातिकका तर्फबाट सांसदहरु बनाउन नहुने दाबी पनि गर्दै आएको छ ।सडक संघर्षका कार्यक्रम अनुसार बुधबार काठमाडौंको विभिन्न ठाउँमा कोण सभा आयोजना गरिनेछ । विहिबार मोटरसाइकल र्याली र शुक्रबार बबरमहल अगाडि जम्मा भई संसद भवन अगाडि जुुलुस र आमसभा आयोजना हुनेछ ।