सन २०१९ मा रोजगार अनुमति प्रणाली ईपीएस मार्फत दक्षिण कोरियामा नेपाली प्रशिक्षार्थी कामदार छनोट गर्नका लागि लिइने नवौं परीक्षाको आवेदन फाराम संकलन कार्य आजबाट सुरु भएको छ ।

ईपीएस कोरिया शाखाले वैदेशिक रोजगारीका लागि दक्षिण कोरियामा नेपाली प्रशिक्षार्थी कामदार छनोटका लागि आजबाट परीक्षामा सहभागी हुनेहरुले आवेदन फाराम अनलाइनमार्फत संकलन गर्न लागेको हो । सो परीक्षामा सहभागी हुनेहरुले आजदेखि चैत १७ गतेसम्म आवेदन फाराम अनलाइनबाटै भर्न सक्नेछन् । यो भाषा परीक्षामा सहभागी हुनका लागि १८ बर्ष पूरा भई ३९ बर्ष ननाघेको नेपाली नागरिक हुनुपर्ने उमेर हदबन्धी तोकिएको छ ।

परीक्षामा सहभागी हुन चाहनेहरुले ईपीएस कोरिया शाखाको नेपालको आधिकारिक वेबसाइटबाट लग इन गरी उल्लेख भएका विवरण अनलाइनबाटै भर्न पाउनेछन् । जसका कारण फाराम भर्न घन्टौँ लाईन बस्नु पर्दैन ।

यसपटक कुन ७ हजार १ सय जना प्रशिक्षार्थी कामदार उत्तीर्ण गर्ने योजना रहेको ईपीएस शाखाले जनाएको छ । जसमा ४ हजार ८ सय जना उत्पादन क्षेत्रमा र कृषि क्षेत्रमा र २ हजार ३ सय जनाको कोटा निर्धारण गरिएको छ । सन २००७ मा नेपालसँग श्रम सम्झौता गरेको कोरियाले सन २००८ देखि नेपाली कामदार लिन सुरु गरेको हो ।