सत्तारुढ नेपाल कम्युनिष्ट पार्टी (नेकपा) का सांसद पार्वत गुरुङको जिल्ला अदालत काठमाडौंमा बयान सुरु भएको छ । दोलखाबाट प्रतिनिधिसभा सदस्यमा गुरुङलाई ज्यान मार्ने उद्योग मुद्दामा जिल्ला अदालत काठमाडौंले ३५ दिने म्याद जारी गरेको थियो ।

अदालतमा म्याद जारी गरेपछि गुरुङले आज अदालतमा उपस्थित भएर बयान दिएको अदालत स्रोतले जानकारी दिएको छ । अदालतले जारी गरेको म्याद जिल्ला प्रहरी कार्यालय दोलखाले तामेली गरेको थियो । सांसद गुरुङसहित ७ जनाविरुद्ध म्याद जारी भएकोे थियो ।

उनीहरूमाथि निर्वाचनका समयमा एक व्यक्तिमाथि ज्यान मार्ने उद्देश्यले सांघातिक आक्रमण गरेको भन्दै मुद्दा दायर भएको थियो ।