गुल्मीको इश्मा गाउँपालिका–१ मल्दी ढाँटफाँटमा पहिरो जाँदा दुई जना वेपत्ता भएका छन् । दुई जनालाई भने उद्धार गरिएको छ ।

एक जना महिला र एक जना पुरुषलाई स्थानीयवासीले उद्धार गरेको इश्मा गाउँपालिकाका अध्यक्ष लक्ष्मणबहादुर विष्टले बताए ।

उनले अरु दुई जना भने बेपत्ता रहेको पनि जानकारी दिए ।

गएरातिदेखि परेको पानी कारण पहिरो जाँदा सो स्थानमा १५–२० घर जोखिममा समेत परेका छन् । उद्धारका लागि सदरमुकाम तम्घासबाट नेपाली सेना, सशस्त्र र नेपाल प्रहरीको टोलीलाई बोलाइएको छ ।

पहिरोले इश्मा गाउँपालिकाको वडा नं. ४ को रातापानी र न्वाल भन्ने स्थानमा १४ घर परिवार विस्थापित भएका छन् । यसैगरी छोरेडाँडाका पाँच घर परिवार बिस्थापित भएका छन् ।

ढाँडको कालिका निमाविको भवन पनि पहिरोले भत्काएको छ ।